Tsis Xa Tso Koj Rau Luag

Nco nroov cim daimduab cia kom zoo, sijhawm yuav dhau zoj mus ntau xyoo, nws tseem tshiab khiv li qub. Cas muab nws nriab nkaus coj los qhub, nws twb tsis ciajsia, tsis txawj hais ib lolus los teev lub kuamuag iab? Ra muag nria nruabntug pom me fuabdub ya sib qoov, lub ncauj tsis hais lub siab nim poob nroog - lub kuamuag ntws nto nco txog tejchaw ntoj - lub caij thaum tham phone thawj zaug hais txog txoj kev sib hlub uas muaj zog: koj hais tau lus mos luagntxhi, zoo lub siab tshaj xav tias tiam neej no yuav muaj los ua leejhlub nyob lub xubntiag mus ib sim - lub kuamuag yuav tsis muaj hnub txawj plam si!!!

Cas ziag no yuav txawv hlo, cia mus saib daimduab pem ntavtoj, sijhawm khiav mus dhau ntau xyoo lawm mog; muab xav txog tsausmuag, vim nploojsiab lubnrws seev quaj nco txog lub caij wb tuaj mus sib fim thawj zaug hauv lub nriabmuag: "KOJ HNAV LUB RHO XIAV NROG LUB RIS DAWB, KOJ COBXUB ZOONKAUJ NTXIM HNIA TUAJ MUS NTXIM TAWB; KUV HNAV LUB TSHO DAWB NROG LUB RIS DUB, KUV COBXUB MUAJ TSIM ZOONRAUG NTXIM TAWB TUAJ MUS NTXIM HLUB." Lub ncauj tsis hais, nplooj siab twb ya yuj tuaj mus sib qawg - xav tias yeej yuav yog wb kev txijnkawm. Thiaj tau pib muaj txoj kev sib nyiam nyob lub siab, tau pib muaj txoj kev sib hlub nyob lub cev ntajnrug; kuv thiaj hnia koj - koj thiaj puag kuv, txawm tshav ntuj kub yuav muaj neeg coob nyob mus puv toj, yeej tsis pom thiab khoom saib leeg twg hlo; nploojsiab lubnrws vau los sib qawg, sib ib yam li niam-txiv, muab txoj kev nyiam los ua lub chaw pib, muab txoj kev hlub los ua lub chaw sib khi; kev sib nyiam - mob siab thiaj tau chiv, xav kom lub ntiaj teb tsuas muaj koj nrog nraim kuv mus ib txhiab tsov ib txhis. Vim dabtsi txoj kev sib hlub kev sib ntshaw uas tawg paj paug nyob mus txi ncw txiv, yuav los mus xaus zoo li zaj dabneeg nkaujhnub thiab nraughli os leejhlub tus zoonkauj - koj ntxim hlub kawg siab tuaj mus ntxim nyiam kawg nrws - tsis xav tseg rau ib qhov chaw twg.

Lub sijhawm dhau lawm zujzus, cas nplooj siab yuav mob ntxhia ntxhig rau txoj kev sib hlub, lub plawv thiaj tawg tsisua tuaj mus puv ntuj. Vim txoj kev sib hlub wb tau tsim muaj zoo tshaj daabneeg keev muaj los, thiaj saub seev sob lus nco tuaj mus nrhiav koj mog. “KUV HLUB KOJ,” tswj txojsia nrees nyob nrog kuv nploojsiab, koj tus ntsujduab thiab lub fwjchim zoo yuav nyob nrog nraim lub siab mus txhua tiam. Tej lus tsim hnuj nyob mus tsau nqi - wb tau cog tseg tiam no yuav ua lub xauv xuv lub siab txoj kev uazoo cia, txawm tias lub ntuj yuav pob mus ua av tag - lub ntiajteb yuav ntsoog mus ua dej ntws, tseem tshuav koj tus ntsuj duab thiab txoj kev zoo sibkhawm rawv nyob nrog nraim kuv txhais npab xwb. Tus ntsujplig lub fwjchim zoo yuav ua lub teeb rom ci nra rau wb pom kev mus rau txhua txoj kab, yuav ua lub kaus roos tshav roos nag tsis muaj hnub tag... Thov lub ntuj pov lub teb puag, hwm wb txoj kev sib hlub kev ua zoo cia mus ua ib hauv tshuaj kuab muaj tsuas los kho wb nploojsiab lub nrws nyob mus tsuas muaj sib hlub tsov sib tshua. Yog tiam twg wb tsov tau sib ntsib wb yuav tsov hlub ntxiv, thaum ntawd yuav muab koj rub zog rau kuv lub xubntiag tsis kam cia koj dim. Wb mam sib hlub ua lub neej thajyeeb nyob saum nplaim dej, wb txoj kev sib hlub thiaj tsis nplua npleev li txhib zeb, wb mam sib fwm ua lub neej kajsiab nyob saum yaj ceeb, wb txoj kev sib hlub, kev coj ua zoo thiaj tsis yog dabneeg lawm mog...